Driver utas, trader sugatan sa holdaper
TALAVERA, Nueva Ecija, Philippines – Patay ang isang 49-anyos na family driver habang sugatan naman ang amo nitong negosyanteng babae nang paulanan ng bala ng mga humahabol na holdaper sa kahabaan ng provincial road, Brgy. Homestead II, ng bayang ito, kamakalawa ng madaling araw.
Kinilala ng pulisya ang nasawing biktima na si Rufino Patricio Valdez ng Brgy. Bagong Sikat, Talavera, Nueva Ecija, habang isinugod naman sa Nueva Ecija Doctors Hospital ang sugatang biktima na si Evelyn del Rosario, 56, may-asawa, mini grocery owner, ng Brgy. Bagong Sikat, Talavera.
Nabatid kay P/Supt. Wilfredo Paulo, hepe ng Talavera Police, patungo sa Talavera Public Market ang dalawang biktima, sakay ng tricycle (OJ-4269), dakong alas-3:30 ng madaling araw nang bigla umano silang harangin ng dalawang holdaper sa madilim na bahagi ng nasabing lugar.
Nilusutan umano ng dalawang biktima ang dalawang armadong lalaki sa pamamagitan ng pagpapatakbo nang matulin sa tricycle ngunit agad silang hinabol ng mga ito at pinagbabaril.
Minalas namang masapul ng tama ng bala ang driver na siya nitong ikinasawi habang sugatang isinugod sa pagamutan ang ginang.
- Latest
- Trending
