2 holdaper bulagta sa shootout
MANILA, Philippines - Dalawang kalalakihan na sinasabing notoryus na holdaper ang napaslang matapos makipagbarilan sa mga pulis sa inilatag na checkpoint sa Maharlika high way, Barangay Turbina sa Calamba City, Laguna kahapon ng madaling-araw.
Lumilitaw na sangkot ang mga suspek sa holdapan kung saan natangay ang P.2 milyong payroll at pambonus sa mga tauhan ng negosyanteng si Simeon Valencia sa bayan ng Cabuyao, Laguna.
Sa phone interview, sinabi ni Calamba City PNP director P/Supt. Joel Pernito, naispatan ng kaniyang mga tauhan ang naka-flash alarm na sinasakyan ng mga suspek na kotse (Honda Civic) na may plakang WRA-119 kung saan tinangkang umiwas sa checkpoint.
Tinangkang parahin ng pulisya upang inspeksyunin pero agad na nagpaputok ang dalawang sakay ng kotseng puti na nauwi sa habulan.
Nakorner naman ng pinag sanib na puwersa ng pulis-Calamba, Regional Special Operations Group at Regional Public Safety Battalion ang mga suspek sa may underpass ng South Luzon Expressway sa Brgy. Turbina kung saan nauwi sa shootout.
Nagawa namang makatakas ng backup na motorsiklo na lulan ng isa pang holdaper na pakay naman ng hot pursuit operations ng pulisya.
Narekober sa kotse ang dalawang cal. 45 pistol, granada at ang P.2 milyong payroll kung saan naibalik sa nasabing negosyante.
- Latest
- Trending
