3 holdaper dedo sa barilan

MANILA, Philippines - Tatlong armadong kalalakihan na sinasabing notoryus na holdaper ang iniulat na napaslang matapos makipagbarilan sa operatiba ng pulisya sa Barangay Sindalan, San Fernando City, Pampanga kahapon ng madaling-araw. Sa police report na nakarating sa Camp Crame, lumilitaw na ang tatlo ay nanloob sa isang tindahan saka tumakas lulan ng motorsiklo. Subalit nasabat sa inilatag na checkpoint saka nakipagbarilan sa pulisya. Sa palitan ng putok ay kapwa napatay ang dalawa habang ang isa ay hinabol naman bago napatay din sa engkuwentro ng mga operatiba ng pinagsanib na Regional Public Safety Battalion, Provincial Public Safety Company at Special Weapons and Tactics team. Sa kasalukuyan ay inaalam pa ang pagkakakilanlan ng mga napatay na holdaper habang narekober ang motorsiklo, isang cal .40 pistol, cal 38 revolver at isang shotgun.