Karnaper dedo sa shootout

BULACAN, Philippines — Napaslang ang isang miyembro ng carnapping group makaraang makipagbarilan sa pulisya sa inilatag na checkpoint kahapon ng umaga sa Brgy. Malhacan sa Meycauayan City, Bulacan. Kinilala ni P/Senior Supt. Fernando Villanueva, ang napatay na si Rommel Gabriel, 39, ng Brgy. Karuhatan, Valenzuela City at sinasabing kasapi ng grupong Raymond Dominguez na responsable sa serye ng carnapping sa Bulacan at karatig pook. Ayon kay P/Supt. Noli Pacheco, nabawi kay Gabriel ang kinarnap na Toyota Revo (XMH 917) ni Carmelita Manalang ng Cainta, Rizal. Sa tala ng pulisya, ang grupo ni Gabriel ay responsable rin sa pagkawala ng Isuzu D-Max (XTF368) ni Thomas Canlas na kinarnap sa Brgy. Bacolor, Pampanga noong Hunyo 25, 2010 at ang Toyota Vios (SHV 134) ni Councilor Susan Dulalia na kinarnap naman sa Brgy. Libtong, Meycauayan City noong Hulyo 8, 2010.