2 laborer hinoldap, pinatay

BAYOMBONG, Nueva Vizcaya , Philippines  — Dalawang laborer ng PBO Construction sa Hal­sema Highway sa Mt. Province ang pinatay ma­ta­pos na holdapin ng mga hindi pa nakikilalang mga suspek kamakalawa ng hapon.

Kinilala ng pulisya ang mga biktima na sina Ed­mund Ri­vera, 34, driver at Ben Balasi, 41, heavy equip­ment operator, kapwa residente ng Tabuk Kalinga.

Ayon kay Sr. Supt. For­tunato Albas, Mt. Province police provincial director, sina Rivera at Balasi ay kapwa em­pleyado ng PBO Construction na nama­mahala sa reha­bilitasyon ng P1.2 billion Bontoc-Kalinga national road na bahagi ng Halsema Highway na kasalukuyang pangu­nahing proyekto ng gobyerno.  

Dakong alas-10:00 kama­kalawa ng gabi naganap ang insidente habang nagla­lakad pauwi ang mga biktima sa ka­ni­lang quarters nang sundan sila umano ng mga suspek at pagbabarilin sa magubat na bahagi ng sitio Tabrak, Barangay Anabel, Sa­danga Mt. Province.

Ayon pa kay Albas, ilan sa mga katrabaho umano ng mga biktima ang naka­rinig sa magkakasunod na putok ng baril subalit hindi umano nila ito pinansin sa pag-aakala na ang mga putok ay galing sa tropa ng militar na nasa nasasa­kupan ng lugar.

Nadiskubre na lamang ang mga bang­kay ng dala­wang biktima na may mga tama ng bala ng baril sa ba­wat ulo at dibdib.

Nakuha ng mga aw­to­ridad sa pinang­yarihan ng kri­men ang walong basyo ng M16 rifle at bahagi ng bungo ng mga biktima. Nawawala din ang mga wallet at maha­halagang gamit ng mga bik­tima.