15 bayan sa Ilocos Norte nasa state of calamity

BAGUIO CITY, Philippines – Aabot sa 15 bayan sa Ilocos Nor­te na sinasabing lumubog sa tubig-baha dahil sa ma­tinding hagupit ng bagyong “Isang”noong nakalipas linggo ang isinailalim na sa state of calamity.

Kabilang sa mga ba­yang sinalanta ng bagyo ay ang Dingras, Nueva Era, Paoay, Batac, Adams, Pinili, Piddig, San Nicolas, Banna, Marcos, Solsona, Sarrat, Pasuquin, Pagud­pud at bayan ng Currimao.

Base sa ulat ng Provincial Disaster Coordinating Council (PDCC) umabot sa 143 barangay ang naapek­tu­han na binubuo ng 10,000 pamilya na katum­bas ng 44, 579 indibiduwal.

Maaaring gamitin ng provincial government ang emergency funds para ma­ipamahagi sa mga pamil­yang nawalan ng kabu­ha­yan sa kani-kanilang bayan partikular na ang mga mag­sasaka.

Idineklara na rin ng Sang­guniang Panlalawi­gan ang buong Ilocos Norte na isailalim sa state of calamity matapos ireko­menda ng provincial disaster and coordinating council at ng Mayors’ League of Ilocos Norte, ayon kay Go­vernor Michael Keon.

Sa kasagsagan ng bag­yong “Isang” noong Hulyo 17, umapaw ang mga ilog, at irrigation canal kung saan naapektuhan ang lahat ng highway sa na­bang­git na lalawigan na nag­resulta para ma-stranded ang mga motorista sa loob ng ilang oras.

Naapektuhan din ng landslide ang hilagang bahagi ng mga bayan kung saan aabot sa 135 baka at 18 kalabaw ang nalunod, ayon sa ulat ni Dr. Loida Valenzuela ng provincial veterinary office.

Sa tala ng provincial engineering office, aabot na rin sa P4.2 milyong ha­laga ang nawasak sa mga pan­lalawigang lansa­ngan ha­bang inaalam pa ng mga awtoridad ang na­wala sa agrikultura. Artemio A. Dumlao