P1.23-B shabu nasabat

CAMP VICENTE LIM, Laguna — Aabot sa 246 kilong high grade shabu na may street value na P1.23 bilyon ang nasabat maka­ra­ang maaksidente ang isang van sa South Luzon Express­way na sakop ng Barangay Prinza, Calamba City, Laguna kahapon ng umaga.

Ayon kay P/Chief Supt. Perfecto Palad, hepe ng Traffic Management Group (TMG), napansin ng kanyang mga tauhang nagbabantay sa checkpoint  sa may north­bound ng Calamba City toll gate, ang isang Toyota Hi-Ace van (WHE-567) at Toyota Revo na naghaha­bulan bandang alas-10:30 ng umaga

Kaagad namang hinabol ng mga tauhan ni Palad, ang dalawang sasakyan hang­gang sa makarating sila sa may Barangay Prinza at ma­tagpuan ang nakataob na Toyota hi-ace van sa gilid ng nabanggit na lugar.

 “Sinubukan pang habulin ng TMG ang Toyota Revo, pero hindi na nila inabutan,” pahayag ni Palad sa PSN.

Pagbalik sa pinang­ya­rihan ng aksidente, doon nila nadiskubre ang 25-sako ng high grade shabu sa loob ng van.

Sa isinagawang record check ng TMG sa Land Trans­portation Office, nadis­kubre nila na nakarehistro ang van sa isang Dante Litada ng Barangay Butuan sa bayan ng San Fernando, Masbate.

 “Malaki ang paniniwala namin na nagmula sa Mas­bate ang shabu para dalhin sa Metro Manila nang ma­aksidente sa Laguna kung saan nakatakas ang dala­wang sakay nito,” dagdag pa ni Palad.

Kasalukuyang binebe­ripika si Litada sa Masbate para linawin kung ano ang kinalaman nito sa mga na­samsam na bilyong halaga ng shabu.

Ayon naman kay P/Supt. Mark Edison Belarma, hepe ng Criminal Investigation and Detection Group (Region 4-A), notoryus ang Barangay Bu­tuan sa Masbate na source ng shabu dahil sinalakay na nila ito noong 2002. (Dagdag ulat ni Joy Cantos)