Lider militante dinukot sa Cavite

CAMP VICENTE LIM, Laguna — Isang 61-anyos na militanteng lider ang iniulat na dinukot ng mga ’di kilalang kalalakihan sa bahagi ng Barangay Sta. Cruz, Dasmariñas, Cavite noong Martes ng hapon.

Kinilala ni P/Senior Supt. Fidel Posadas, Cavite police director, ang kinidnap na biktimang si Lourdes Rubrico, alyas Nanay Ode ng Barangay San Nicolas, Dasmariñas, Cavite at tumatayong presidente ng Umaga Federation sa ilalim ng Kalipunan ng Damayang Mahihirap (Kadamay) sa Cavite.

Ayon sa ulat, bandang alas-2:30 ng hapon habang nagbabasa ng Pasyon si Rubrico nang lapitan at kaladkarin ng anim na armadong kalalakihan saka isinakay sa kulay brown na van na may plakang XRR-428.

Sa ginawang record check ng PSN sa Land Transportation Office, napag-alaman na ang plakang XRR-428 ay nakarehistro sa isang kulay puting Mitsubishi L-300 van na pag-aari ng AK Cottage Industry sa Parañaque City.

Sinisilip pa rin nina Col. Posadas, ang awayan sa lupa na posibleng motibo ng pagdukot sa lider militante.

"Maaring may nagka-onsehan sa bentahan ng lupa, pero iniimbestigahan pa namin kung sino ang biktima at ang nambiktima dito," pahayag ni Posadas. Mariin namang kinundena ni Arman Arbarillo, secretary general ng Bagong Alyansang Makabayan-Southern Tagalog, ang Armed Forces of the Philippines na itinuturong may kinalaman sa insidente.

"Kilalang kritiko si Nanay Ode sa pamahalaan pagdating sa usaping panglupa kaya posibleng pinatatahimik ito," dagdag pa ni Arbarillo

Nagsasagawa na rin ng follow-up operations ang mga pulis-Cavite para hanapin ang nawawalang biktima. (Arnell Ozaeta at may dagdag ulat ni Edwin Balasa)