Ama lumaklak ng asido, patay

ANTIPOLO CITY – May posibilidad na nakonsiyensiya at natakot na makulong kaya lumaklak ng asido at namatay ang isang 44-anyos na ama makaraang molestiyahin nito ang sariling anak na dalagita sa Barangay Sta. Cruz, Antipolo City, kahapon.

Sa Antipolo Community Hospital kinalawit ni kamatayan si Romeo Ramirez ng Sitio Kamias ng nabanggit na barangay.

Lumilitaw sa imbestigasyon ng pulisya na naaktuhan sa loob ng kanilang bahay ng nakatatandang anak ang kanyang senglot na ama na minomolestiya nito ang 13-anyos na dalagitang anak na hayskul student.

Agad namang humingi ng saklolo ang nakatatandang anak ng suspek sa mga awtoridad, subalit hindi na inabutan sa kanilang bahay at nagtungo sa kamag-anakan sa Barangay San Juan.

Ayon pa sa ulat, kinabukasan nang nagbalik ang suspek sa kanilang bahay na pinaniniwalaang hindi mapakali at nakonsiyensiya sa ginawang krimen kaya naisipang lumaklak ng asido.

Inabutan ng mg kasambahay ang suspek na walang tigil sa pagsusuka kaya dinala sa nabanggit na ospital at ilang oras na ginagamot ay binawian din ito ng buhay. (Edwin Balasa)