2 paslit naglaro sa ilog, nalunod

CAVITE – Dalawang batang lalaki ang idineklara ng mga manggagamot sa Cavite Municipal Hospital na dead-on-arrival makaraang malunod sa Maragondon River sa Marogondon, lalawigang ito kamakalawa.

Kinilala ang mga biktima na sina Vincent Paul Ramirez, 8, at John Paul Villaranda, 7, kapwa residente ng Brgy. Caingen 3, ng bayang nabanggit.

Batay sa imbestigasyon ni PO3 Alberto Avinante, dakong ala-1 ng hapon nang makaramdam ng init ang dalawang biktima matapos na maglaro sa kanilang tahanan kaya mabilis na nagkayayaang maligo sa ilog. Habang nagtatampisaw sa tubig ay hindi namalayan ng dalawang bata na nasa malalim na bahagi na sila ng ilog kung kaya kapwa lumubog dahil hindi naman sanay na lumangoy. Ilang oras pa ang nagdaan nang mapansin ng mga kaanak nila na nawawala ang mga bata at may nakapagsabi namang nakita ang mga ito na papunta ng nasabing ilog. Agad nilang tinungo ang ilog at dito nakita ang dalawang bata na nakalutang. (Cristina Go Timbang)