Aurora, Nueva Ecija lubog sa baha

Dalawampu’t anim na barangay sa lalawigan ng Aurora at Nueva Ecija sa hilagang silangan ng bansa ang lumubog sa tubig baha dulot ng malalakas na pag-ulan sa lugar, ayon sa Office of Civil Defence (OCD) kahapon.

Sinabi ni Dr. Anthony Golez Jr., Deputy Administrator ng OCD, sa kasalukuyan ay patuloy ang kanilang pagmomonitor sa mga lugar na sinalanta ng flashfloods.

Batay sa report, dakong alas-6:00 ng umaga kahapon ng lumubog sa hanggang tuhod at dibdib na baha ang 24 barangay sa Casiguran, Aurora.

Samantalang dalawa pang lugar na kinabibilangan ng Bgy. Bagong Sikat at Tagumpay sa bayan naman ng Gabaldon, Aurora ang maapektuhan rin ng flashfloods sanhi ng pag-apaw ng Tupingan River dito.

Ayon kay Golez, anim na spill gates rin ng Magat Dam sa lalawigan ng Isabela ang kanilang binuksan upang maiwasan ang pag-apaw nito na kung ‘di mapipigilan ay makakaapekto sa daan-daang pamilya na naninirahan sa lugar.

Nangangamba naman ang mga residente sa Aurora na maulit na naman ang landslide sa kanilang lalawigan.

Nabatid pa na ang malakas na pag-ulan ay sanhi ng active low pressure area may 570 kilometro ang layo sa Coron, Palawan na inaasahang magdudulot pa ng hindi magandang lagay ng panahon. (Joy Cantos)