Kapitan itinumba; mag-ina kritikal

Camp Crame — Isang Brgy. Chairman ang nasawi habang nasa kritikal namang kondisyon ang kanyang mag-ina matapos tambangan ng dalawang di pa nakilalang mga armadong lalaki ang behikulong kanilang sinasakyan sa Tarlac kamakalawa.

Dead on arrival sa Camiling District Hospital ang biktimang si Brgy. Captain Artemio Carmen Sr. ng Brgy. Quinones, Mayantoc ng lalawigang nabanggit.

Samantalang sanhi ng grabeng kondisyon sa tinamong mga tama ng bala sa iba’t-ibang bahagi ng katawan ay kinailangang ilipat sa Ramos Hospital ang kanyang mag-inang sina Juanita at Artemio Jr. para sa kaukulang medikasyon.

Sa ulat, bandang alas — 10:25 kamakalawa ng tanghali habang ang mga biktima ay lulan ng isang Brgy. Patrol Susuki multicab galing sa palengke nang paulanan ng bala ng dalawang suspek na pawang nakasuot ng camouflage sa kahabaan ng Provincial Road, Brgy. Poblacion Sur, Mayantoc.

Narekober sa crime scene ang siyam na basyo ng bala ng caliber 9 MM pistol. Isang follow-up investigation ang isinasagawa ng pulisya para matukoy ang motibo at pagkakakilanlan ng mga suspek. (Joy Cantos )