Mag-utol niratrat, 1 dedo

Camp Pantaleon Garcia, Cavite – Isa ang kumpirmadong nasawi habang isa pa ang nasa kritikal na kalagayan makaraang pagbabarilin ang magkapatid ng di pa nakilalang mga salarin sa Brgy. Molino 6, Bacoor, Cavite kamakalawa ng gabi.

Kinilala ng pulisya ang nasawi na si Rannel Corpuz, 26-anyos, may-asawa at residente ng Rogud St., Brgy. Molino 6 ng bayang ito habang patuloy namang ginagamot sa Molino Hospital ang nakatatanda nitong kapatid na si Noel Corpuz, 32, may-asawa ng nabanggit ding lugar.

Base sa imbestigasyon ni PO2 Dominador Logon, may hawak ng kaso, bandang alas 7 ng gabi ng maganap ang insidente habang ang magkapatid ay naglalakad sa nasabing lugar nang tambangan ng mga armadong salarin.

Matapos ang pamamaslang ay mabilis na nagsitakas ang mga suspek patungo sa hindi pa malamang destinasyon. Narekober sa pinangyarihan ng krimen ang mga basyo ng bala ng cal. 30 carbine rifle. Sa kasalukuyan ay wala pang malinaw na motibo ang krimen habang patuloy ang imbestigasyon sa kaso. (Ulat ni Cristina G. Timbang)