2 hijacker patay sa barilan

PADRE GARCIA, Batangas – Dalawang hijacker ng kargamento ang iniulat na nasawi makaraang makipagbarilan sa mga kagawad ng pulisya sa Barangay Banaba, Batangas kahapon ng madaling-araw. Kinilala ni Chief Inspector Dionisio Faltado, ang isa sa napatay na si Roderick Matanguihan. Sa paunang ulat, nakatanggap ng impormasyon ang mga tauhan ng pulisya sa bayan ng Padre Garcia at Regional Traffic Management Group na may trak ng kargamento ang hinaydyak sa Lipa City kaya naman nagtayo ng checkpoint ang mga awtoridad sa Barangay Poblacion. Nang mamataan ng pulisya ang trak na hinaydyak ay agad na pinara, subalit nagtuluy-tuloy kaya napilitang habulin ng mga kagawad ng pulisya hanggang sa magkabarilan sa nabanggit na barangay. (Ulat nina Arnell Ozaeta at Ed Amoroso)