3 todas sa araro ng trak

TAYABAS, Quezon – Tatlo-katao ang kumpirmadong namatay samantalang dalawa naman ang nasa kritkal na kondisyon makaraang araruhin ng trak ang bahay ng mga biktima sa gilid ng Maharlika Highway na sakop ng Barangay Calumpang sa bayang ito kamakalawa ng hapon. Kabilang sa nasawi ay nakilalang sina Norma Nuñez, 48, anak nitong si Oliver, 4 at pamangking si Maryjoy na isang taong gulang. Ginagamot naman sa Lucena United Doctors Hospital sa Lucena City ang mag-amang sina Oscar, 49 at Norman Nuñez, 18. Nabatid sa imbestigasyon ng pulisya, naitala ang sakuna dakong alas-2:30 ng hapon matapos na pumutok ang gulong ng trak (UGX-879) na minamaneho ni Jonel de Chavez ng Candelaria, Quezon. Nawalan nang kontrol ang drayber ng trak kaya nagtuluy-tuloy sa bahay ng pamilya Nuñez na kasalukuyang gumagawa ng furniture. (Ulat ni Tony Sandoval)