Chief security itinumba

Pinagbabaril hanggang mapatay ang isang chief security officer ng State Polytechnic College of Palawan ng mga hindi kilalang maninikwat habang ang biktima ay nag-iinspeksiyon sa loob ng eskuwelahan sa Barangay San Juan, Aborlan, Palawan kamakalawa ng gabi.

Sampung tama ng bala ng baril sa katawan ang tumapos sa buhay ni Joselito Castro, 41 kaya hindi umabot pa sa Aborlan Hospital.

Sa imbestigasyon ni SPO2 Romeo Agbon na habang nagbabantay ang dalawang security guard na sina Rafael Venturillo at Rolando Arillano sa gate ng nasabing kolehiyo ay nakarinig sila ng sunud-sunod ng putok ng baril.

Agad na tinungo ng dalawa ang pinagmulan ng malalakas na putok at bumungad sa kanila ang duguang biktima na pinalalagay na itinumba ng mga maninikwat na naaktuhan. (Ulat ni Ed Amoroso)