Trader, driver dinukot sa Laguna

CAMP VICENTE LIM, Laguna – Isang mayamang negosyanteng lalaki at kasamang driver nito ang napaulat na kinidnap ng mga hindi kilalang armadong kalalakihan habang lulan ng kanilang sasakyan at binabagtas ang kahabaan ng Del Rosario St., Brgy. Urigil, Majayjay, Laguna kamakalawa ng gabi.

Kinilala ng pulisya ang mga biktimang sina Reynaldo Mia at driver na si Marsing Lotino na kapwa residente ng nabanggit na barangay.

Napag-alaman sa ulat ng Majayjay PNP station, naganap ang pag-kidnap sa mga biktima dakong alas-6:30 ng gabi habang lulan ng kanilang Mitsubishi Adventure na kulay berde (WHN-649).

Ayon pa sa pulisya, hinarang umano ng mga armadong kalalakihan ang kotse ng mga biktima saka pinababa at isinakay sa naghihintay na kotse na hindi nabatid ang numero ng plaka.

Nabatid pa na hindi ginalaw ang asawa ng biktimang trader na si Agnes Mia bago nagsitakas ang mga kidnaper.

Kasalukuyan pang bineberipika ng mga tauhan ni P/Chief Supt. Domingo Reyes, regional director ng PRO-4, kung katotohanan nga na dinakip ang mga biktima ng mga ahente ng National Bureau of Investigation (NBI) dahil sa mga kasong kinakaharap.(Ulat ni Ed Amoroso)