2 police asset nilikida ng NPA

Dalawang police asset ang niratrat hanggang sa mapatay ng mga armadong kalalakihan na nagpakilalang mga rebeldeng New People’s Army (NPA) sa Davao del Sur, ayon sa ulat kahapon.

Kapwa dead on the spot ang mga biktimang sina Nicasio Lino at Jovel Baguiohanon; magkapitbahay sa Sitio Manat, Brgy. Sibahay, Boston ng nasabing lalawigan.

Batay sa ulat na nakarating kahapon sa Camp Crame, dakong alas-5:30 ng umaga nang bigla na lamang sumulpot sa Sitio Manat ang mga armadong rebelde at kaagad nagtungo sa bahay ng mga biktima.

Ang mga rebelde ay pinamumunuan umano ni Zaldy Latiban, alyas Ka Oca na positibong kinilala ng mga residente sa lugar na nakasaksi sa pangyayari.

Napag-alaman na ang mga biktima ay kagigising pa lamang nang pasukin ng mga suspect sa kanilang mga bahay.

Bigla na lamang pinagbabaril ang dalawa sa harapan ng pamilya at matapos makasigurong patay na ang kanilang target ay mabilis na nagsitakas patungo sa hindi pa malamang destinasyon ang mga rebelde. (Ulat ni Joy Cantos)