AFP todo alerto na rin sa SONA ni Pangulong Marcos

MANILA, Philippines — Todo alerto na rin ang Armed Forces of the Philippines (AFP) para tiyakin ang seguridad sa ikatlong State of the Nation Address (SONA) ni Pangulong Ferdinand “Bongbong” Marcos Jr., na gaganapin sa Batasang Pambansa sa Quezon City bukas, Hulyo 22.

Sina AFP Spokesperson Col. Francel Margareth Padilla, nakahanda na rin ang puwersa ng Joint Task Force-National Capital Region  (JTF-NCR) para tumulong sa kapulisan sa pagpapairal ng seguridad at kapayapaan sa nasabing mahalagang okasyon.

“We are well prepared, we have standby forces coming from AFP-NCR,” pahayag ni Padilla.

Una rito, tiniyak ni Presidential Security Group (PSG) Commander Brig. Gen. Jesus Nelson Morales na “well secured” si Pangulong Marcos at wala silang namo-monitor na banta sa seguridad maging bago pa man ang “designated  survivor” na pahayag ni Vice President Sara Duterte.

Ang PSG ang na­ngunguna sa pangangalaga sa seguridad ng SONA katuwang ang PNP, AFP, MMDA at iba pang security forces.

Inihayag naman ni Col. Xerxes Trinidad, chief ng AFP Public Affairs Office, nasa 500 personnel ng JTF-NCR at dalawang armored vehicle sa ilalim ng JTF-NCR ang kanilang idedeploy para sa ikatlong SONA ng punong ehekutibo.

Nauna rito, sinabi ni National Capital Region Police Office (NCRPO) chief Maj. Gen. Jose Melencio Nartatez Jr. na naka-full alert status na ang lahat ng mga police officers at police units simula nitong Sabado para sa SONA.

Nasa 22,000 pulis ang ide-deploy sa SONA kung saan 6,000 dito ay ikakalat sa bisinidad ng Batasang Pambansa sa QC na pagdarausan ng okasyon habang nasa 2,700 ang force multipliers at nasa 1,400 PSG personnel ang itatalaga rin sa SONA.