OSG ipinababasura sa Korte Suprema ang petisyon ni Quiboloy

MANILA, Philippines — Ipinababasura ng Office of the Solicitor General (OSG) sa Korte Suprema ang petisyong inihain ni Kingdom of Jesus Christ Pastor Apollo Quiboloy sa inisyung arrest order laban sa kanya ng Senate Committees on Public Order at Dange­rous Drugs and Women and Children.

Sa komentong inihain ng OSG para sa Senado, hiniling ni Solicitor Gene­ral Menardo Guevarra sa Korte Suprema na ibasura ang aplikasyon ni Quiboloy para sa temporary restraining order (TRO) at writ of preliminary injunction.

Ayon kay Guevarra, si Quiboloy ay hindi entitled na humingi ng ‘relief’ dahil malinaw aniya na wala naman itong intensiyon na isumite ang kanyang sarili sa proseso ng hukuman at ng Senado.

Idinagdag pa ni Guevarra na ang isinasagawang imbestigasyon sa Senado ay ‘in aid of legislation’ at ang inbokasyon ng pastor ng kanyang constitutional right against self-incri­mination ay wala sa lugar.

Matatandaang si Quiboloy ay inisyuhan ng mga komite ng Senado ng warrant of arrest matapos na mabigong dumalo at isnabin ang subpoena sa isinasagawa nilang imbestigasyon laban sa mga umano’y pag-abuso nito.

Bukod dito, si Quiboloy ay inisyuhan din ng warrant of arrest ng mga hukuman na humahawak sa mga kinakaharap niyang kasong qualified human trafficking at child and sexual abuse.

Mariin naman nang pinabulaanan ni Quiboloy ang mga naturang akusasyon.