2 babaeng sakay ng motor, todas sa bangga
MANILA, Philippines — Kapwa nasawi noon din ang dalawang babaeng magkaangkas sa isang motorsiklo nang bumangga sa center island sa Sampaloc, Maynila. kahapon ng madaling araw.
Kinilala ang mga nasawi na sina Reana Antoinette Tomas, 23, ng San Antonio, Parañaque City at Ana Mae Adlaon, ng Misamis Oriental.
Sa inisyal na report ng Manila District Traffic Enforcement Unit (MDTEU), alas-5:00 ng madaling araw nang maganap ang aksidente sa northbound lane ng Lacson Avenue, pababa sa Nagtahan bridge, kanto ng G. Tuazon St. sa Sampaloc.
Minamaneho ni Tomas ang motorsiklo, angkas si Adlaon at pagsapit sa pababang bahagi ng Nagtahan bridge ay bigla na lang siyang nawalan ng kontrol sa behikulo.
Dahil dito, bumangga ang motorsiklo sa center island na nagresulta sa pagtilapon nila at pagbagsak sa sementadong kalsada.
Mabilis nakaresponde ang mga tauhan ng Triple D Philippine Eagle ngunit patay na ang mga biktima nang kanilang datnan.
- Latest
