Maglola patay sa bumagsak na puno

MANILA, Philippines — Isang 73-anyos na lola at 12-anyos nitong apong lalaki ang binawian ng buhay matapos madaganan ng dambuhalang puno ng acacia ang kanilang tahanan sa Isabela City, Basilan nitong Sabado ng madaling araw.

Kinilala ang nasawing matanda na si Florita Benitez at apo nito na si Irvin Utong; pawang residente ng Purok Molave, Brgy. De San Rafael, ng naturang lungsod.

Sa ulat, bandang alas-3:00 ng madaling araw nang mangyari ang insidente sa nasabing lugar.

Ayon sa imbestigasyon, mahimbing na natutulog ang maglola nang bigla na lamang matumba ang isang malaking puno ng acacia na dumagan sa tahanan ng mga ito.

Nabatid na sa mismong tulugan pa ng mga biktima bumagsak ang dambuhalang puno kung saan wasak na wasak ang kanilang tahanan at hindi na nakaligtas pa ang mga biktima.

Nabatid na ilang araw nang umuulan sa lugar kaya lumambot umano ang lupa na naging dahilan para matumba ang puno.