Mavs kinuha ang 2-1 lead
DALLAS — Humakot si Luka Doncic ng 22 points, 10 rebounds at 9 assists para banderahan ang Mavericks sa 101-90 paggupo sa Los Angeles Clippers at kunin ang 2-1 lead sa Western Conference first-round series.
Nagdagdag si Kyrie Irving ng 21 points para sa Dallas na nagtayo ng 18-point lead sa third period bago napababa ng Los Angeles sa anim sa fourth quarter.
Tumipa si rookie center Dereck Lively II ng 13 points sa first half para sa Mavericks.
Umiskor sina James Harden at Norman Powell ng tig-21 points para sa Clippers, habang may siyam at pitong marka sina Kawhi Leonard at Paul George, ayon sa pagkakasunod.
Sa Phoenix, kumamada si Anthony Edwards ng 36 points para pamunuan ang Minnesota Timberwolves sa 126-109 pagbaon sa Suns at itayo ang 3-0 lead sa kanilang first-round series.
Sa Indianapolis, kinumpleto ni Tyrese Haliburton ang isang three-point play sa huling 1.6 segundo para igiya ang Indiana Pacers sa 121-118 overtime win sa Milwaukee Bucks at ilista ang 2-1 lead sa Eastern Conference first-round playoff duel.
- Latest
