Cool Smashers may patutunayan
MANILA, Philippines — Aminado si Jema Galanza na hindi na ito ang dating Creamline na kinakatakutan.
Ngunit sa Game One ng 2024 Premier Volleyball League All-Filipino Conference Finals kamakalawa ay ipinakita ng defending champions ang kanilang tikas.
Tinalo ng Cool Smashers ang Choco Mucho Flying Titans, 24-26, 25-20, 25-21, 25-16, sa series opener ng kanilang best-of-three title series sa harap ng 17,457 fans sa Smart Araneta Coliseum.
Sa elimination round ay nakalasap ag Creamline ng tatlong kabiguan bago tumapos bilang No. 4 seed sa single-round robin semifinals kung saan sila nagtala ng 2-1 baraha.
Kasama rito ang pagkatalo sa Choco Mucho.
“Ang daming pinagdaanan, nag-struggle kami ng sobra,” wika ni Galanza. “Kung titingnan n’yo hindi ito iyong Creamline na kilala n’yo, pero ganoon talaga hindi naman kami perfect and iyon nga tumataas iyong level ng competition lumalakas iyong mga players at iyong ibang teams.”
Sa panalo sa Flying Ttans sa Game One ng PVL Finals ay humataw si Galanza ng 20 points mula sa 18 attacks at dalawang blocks bukod sa 13 receptions.
Tuluyan nang makakamit ng Creamline ang ‘three-peat’ sa All-Filipino Conference at pang-walong korona sa kabuuan kung muling tatalunin ang Choco Mucho sa Game Two bukas sa Big Dome.
- Latest