Isa na lang sa Petro Gazz!
MANILA, Philippines — Inilapit ng Petro Gazz ang sarili sa paghablot sa bronze medal matapos lusutan ang Chery Tiggo, 22-25, 25-12, 25-18, 27-29, 15-12, sa 2024 Premier Volleyball League All-Filipino Conference Finals kahapon sa Smart Araneta Coliseum.
Nagpasabog si Fil-Am Brooke Van Sickle ng 36 points mula sa 31 attacks, apat na blocks at isang service ace para sa 1-0 lead ng Gazz Angels sa kanilang best-of-three series ng Crossovers.
“I’m super proud of the team to be able to bounce back after coming off two losses,” wika ng 26-anyos na si Van Sickle. “Chery Tiggo fantastic team, did an amazing job and they took us all the way to five sets like neck and neck.”
Umiskor si Jonah Sabete ng 21 markers kasama ang 19 attacks habang may 15 points si Fil-Am MJ Phillips na may limang blocks at tatlong aces para sa Petro Gazz.
Hindi na naman binigyan ni Japanese coach Koji Tsuzurabara ng playing time si two-time PVL Most Valuable Player Myla Pablo.
Binanderahan ni Eya Laure ang Chery Tiggo sa kanyang 23 points galing sa 21 attacks, isang block at isang ace kasunod ang 11 markers ni Ara Galang.
May pagkakataon ang Gazz Angels na walisin ang Crossovers sa Game Two sa Linggo at ibulsa ang third place trophy.
“Hopefully, we can punch the bronze and hit the goal,” sabi ng produkto ng University of Hawaii na mayroon ding 10 excellent receptions.
Matapos kunin ng Chery Tiggo ang first set, 25-22, ay hinablot ng Petro Gazz ang second and third frames.
Humataw si Laure ng 10 points sa fourth set para itabla ang Crossovers sa 2-2 hanggang makadikit sa 12-14 sa fifth set habang ang service ace ni KC Galdones ang sumelyo sa panalo ng Gazz Angels.
- Latest
