2024 Palaro target gawin ng Cebu sa Hulyo
MANILA, Philippines — Ayaw ng host Cebu City na bagyuhin ang mga kalahok sa pagdaraos nila ng Palarong Pambansa sa susunod na taon.
Kaya plano nilang gawin ang nasabing premier sports event para sa mga student-athletes sa elementary at secondary sa Hulyo.
Aminado ang Marikina City na nahirapan silang maisagawa ang katatapos lamang na 2023 Palarong Pambansa dahil sa pananalasa ng bagyong ‘Falcon ilang araw bago ang pagbubukas ng mga kompetisyon.
Ibinigay ng Department of Education (DepEd), ang chief organizer ng taunang Palarong Pambansa, ang 2024 hosting sa Cebu City matapos talunin ang 2017 host Antique at Negros Occidental sa bidding.
Tumayong host ng Palaro ang “Queen City of the South” noong 1954 at 1994.
Idaraos ang mga events sa Cebu City Sports Center (CCSC), dating Abellana Sports Complex, na itinayo para maging main venue sa Palarong Pambansa noong 1994.
Sa 2023 edition ay muling nanguna ang National Capital Region (NCR) sa 2023 Palaro sa nakolektang 85 gold, 74 silver at 55 bronze medals para kunin ang overall crown sa ika-21 sunod na pagkakataon.
Sumegunda ang Western Visayas sa nahakot na 60 golds, 45 silvers at 44 bronzes kasunod ang Calabarzon (52-52-57), Central Luzon (28-33-46), Central Visayas (26-18-35), Davao (21-18-27), Northern Mindanao (19-20-33), SOCCSKSARGEN (17-19-34), Cordillera Administrative Region (17-17-14), Bicol (13-15-22), Ilocos (9-11-23), Cagayan Valley (8-13-17), at MIMAROPA (6-8-13).
- Latest