Clippers pinalamig ang Miami

LOS ANGELES — Tumipa si Paul George ng 27 points at iniskor ni Reggie Jackson ang lahat ng kanyang 22 markers sa second half para igiya ang Clippers sa 112-109 pagpapalamig sa Miami Heat.

Nag-ambag si Eric Bledsoe ng 21 points at tumapos si Ivica Zubac na may 18 points at 11 rebounds para sa Clippers (7-4) na nakabangon mula sa 17-point deficit sa first quarter tungo sa kanilang ikaanim na sunod na ratsada.

Kumolekta si center Bam Adebayo ng season-high 30 points at 11 rebounds para sa Heat (7-5) at nag-ambag sina Kyle Lowry at Tyler Herro ng 25 at 23 markers, ayon sa pagkakasunod.

Ang dalawang free throws ni Jackson sa huling 3.9 segundo ng fourth period ang nagbigay sa Clippers ng three-point lead para kumpletuhin ang pagresbak sa Heat.

Sa Salt Lake City, nagtala si guard Malcolm Brogdon ng season-high 30 points para akayin ang Indiana Pacers (5-8) sa 111-100 pagdaig sa Utah Jazz (8-4).

Nagsumite si T.J. McConnell ng 21 points, 8 rebounds at 5 assists mula sa bench at tumipa si Myles Turner ng 13 points at 9 rebounds para sa ikalawang road win ng Pacers ngayong season.

Umiskor si Donovan Mitchell ng 26 points sa panig ng Jazz (8-4) at isa sa apat na players na napatalsik sa huling 4:01 minuto ng laro kasama sina center Rudy Gobert, Joe Ingles at Turner.

Itinulak ni Turner si Gobert sa likod nang maimintis ang layup. Bilang ganti ay niyakap ni Gobert si Turner para tangkang pagpapabagsak dito sa sahig kasunod ang pagsugod nina Mitchell at Ingles para sumaklolo.