Grade 3 papasok ng iskul, tepok sa salpok ng motor

MANILA, Philippines — Isang Grade 3 pupil ang nasawi nang masalpok ng motorsiklo habang papasok sa eskuwelahan kamakalawa ng umaga sa Lapu-Lapu City.

Batay sa inisyal report ng Lapu-Lapu City Police Office, nangyari ang aksidente bandang alas-8:30 ng umaga nitong Martes sa Tiangue Road, Barangay Babag ng nasabing lungsod.

Tumatawid ang batang lalaking biktima papasok sa paaralan nang mahagip ng motorcycle rider.

Nabatid na tumilapon pa ang 9-anyos na mag-aaral at tumama ang ulo nito sa semento.

Idineklarang dead-on-arrival sa ospital ang batang biktima dahil sa tinamong matinding pinsala sa ulo.

Nasa kustodiya na ng pulisya ang motorcycle rider at nahaharap sa kasong reckless imprudence resulting in homicide.