JB reresbak kay Rondae

MANILA, Philippines — Hindi pinalad ang Barangay Ginebra na maipu­wersa ang rubber match nang matalo ito sa Talk ’N Text Tropang Giga sa Game 6 ng PBA Governors’ Cup best-of-seven championship series noong Biyernes sa Smart Araneta Coliseum.

Naasahan ng husto ng Tropang Giga si veteran import Rondae Hollis-Jefferson para makuha ang 95-85 panalo katuwang ang mga local players partikular na mula kay Finals MVP Jayson Castro.

Kaya naman desidido si Gin Kings import Justine Brownlee na makaresbak sa Tropang Giga at kay Hollis-Jefferson sa Commissioner’s Cup.

Aminado si Brownlee na mas maganda ang inilaro ng Tropang Giga sa series sa tulong ni Hollis-Jefferson.

“He fits that team very well, he definitely elevates them. They play better with him,” ani Brownlee.

Saludo si Brownlee sa magandang ipinamalas ni Hollis-Jefferson na isa sa tunay na nagpahirap sa Gin Kings sa buong panahon ng championship round.

Umaasa si Brownlee na muling magkukrus ang landas nila ni Hollis-Jefferson dahil desidido itong makabawi sa oras na magkita ang dalawa sa finals.