Baltazar nagpasiklab sa Draft Combine
MANILA, Philippines — Nagpasiklab ang mga aspirante sa Draft Combine kahapon sa Ynares Sports Arena sa Pasig City bago ang 2024 PBA Rookie Draft na nakatakda sa Linggo.
Binanderahan nina potential top picks Justine Baltazar at Kai Ballungay ang 60 pang aplikante na sumabak sa mga athletic at skill tests sa morning session at sa scrimmages kinahapunan.
Kabilang sa mga head coaches na nanood sa Draft Combine ay sina Aldin Ayo ng Converge at Jeff Cariaso ng Blackwater.
Ang FiberXers ang magpapangalan sa No. 1 overall pick ng Season 49 PBA Rookie Draft sa Linggo sa Glorietta sa Makati City kasunod ang Bossing (No. 2), Terrafirma Dyip (No. 3), Phoenix Fuel Masters (No. 4), NorthPort Batang Pier (No. 5) at NLEX Road Warriors (No. 6), Rain or Shine Elasto Painters (No. 7 at 8), Magnolia Hotshots (No. 9), Ginebra Gin Kings (No. 10), Meralco Bolts (No. 11) at San Miguel Beermen (No. 12).
Ang 6-foot-8 na si Baltazar ang inaasahang kukunin ng Converge bilang top pick kasunod ang 6’7 na si Ballungay na target ng Bossing.
Kasalukuyang naglalaro ang 27-anyos na si Baltazar para sa Pampanga Giant Lanterns sa Maharlika Pilipinas Basketball League (MPBL).
May kontrata siya sa Giant Lanterns sa MPBL season hanggang Disyembre.
Ang iba pang nagpasikat sa unang araw ng two-day event ay sina CJ Cansino, Mark Nonoy, Jonel Policarpio, Francis Escandor, Brandon Ramirez at CJ Catapusan.
- Latest
