Back-to-back wins asam ng Creamline

MANILA, Philippines — Matapos ang opening day loss ay nakabawi ang Creamline sa ikalawa nilang laro at ngayon ay target ang back-to-back wins sa Pool A ng 2024 PVL Reinforced Conference.

Lalabanan ng Cool Smashers ang Chery Tiggo Crossovers sa alas-3 ng hapon matapos ang bakbakan ng Farm Fresh Foxies at Galeries Tower Highrisers sa ala-1 ng hapon sa Philsports Arena sa Pasig City.

Sa huling laro sa alas-5 ng hapon ay magkikita ang PLDT High Speed Hitters at Nxled Chameleons.

Tabla sa liderato ang PLDT at Chery Tiggo sa magkapareho nilang 2-0 baraha kasunod ang Creamline (1-1), Nxled (1-1), Farm Fresh (0-2) at Galeries Tower (0-2).

Matapos ang 26-16, 22-25, 26-24, 19-25, 12-15 kabiguan sa High Speed Hitters ay pinatumba ng Cool Smashers ang Foxies, 24-26, 25-23, 25-21, 25-16.

“Kahit naman sa mga coaches namin, hindi nila hinahanap iyong mga wala,” ani Creamline opposite spiker Michele Gumabao kina Alyssa Valdez at Tots Carlos na may injury at Jema Galanza na kasama ng Alas Pilipinas.

Magkasunod namang tinalo ng Chery Tiggo ang Farm Fresh, 25-13, 27-25, 25-22, at ang Nxled, 25-16, 25-20, 25-23, para puntiryahin ang 3-0 record.