OFWs pa-Canada, isasailalim sa beripikasyon – DMW

MANILA, Philippines — Kailangan muna umanong dumaan sa verification process ng mga overseas Filipino workers (OFWs) na patungong Canada.

Ayon kay Department of Migrant Workers (DMW) Officer-In-Charge (OIC) Hans Leo Cacdac, ito ang nakasaaad sa Advisory No. 9 (series of 2024), na inilabas nila kasunod na rin ng mga ulat na may mga OFWs na patungong Canada ang pinagbabayad ng hindi awtorisadong recruitment fees.

Sinabi ni Cacdac na layunin ng contract verification at documentary processing ng DMW sa mga OFWs na pigilan ang illegal recruitment at trafficking of persons.

Ani Cacdac, nakatanggap sila ng ulat na may mga recruiters ng mga OFWs na hindi naman lisensyado ng DMW at naniningil pa ng malaking halaga sa mga applikante na gustong magtrabaho sa Canada.

“We issued the DMW Advisory No. 9. The purpose is to curb illegal recruitment and trafficking of persons. These past few months, we shut down two Canadian immigration consultancies without license from DMW but are recruiting workers for Canada,” pahayag ni Cacdac sa pulong balitaan.

Paraan din aniya ito ng ahensiya upang masusing mamonitor ang kapakanan ng mga OFWs, mabigyan sila ng social protection, sa pakikipag-koordinasyon ng Overseas Workers Welfare Administration (OWWA).

Kabilang dito ang na-hire sa pamamagitan ng Atlantic Immigration Pilot (AIP) na sakop ng POEA Advisory No. 169. Series of 2020 at holders ng Canada’s Open Work Permit sa ilalim ng International Mobility Program na sakop ng POEA Advisory No. 159, Series of 2020.