Hiniwalayan ng nobya, kelot nagbigti

MANILA, Philippines - “Ayoko nang mahirapan. Mahal na mahal kita, Beng. Patawad at salamat”.

Gamit ang lipstick, isi­nulat  ni Romano Maglalang, 23,  ng Ligaya St., Sta. Ana, May­nila  ang mensahe sa dingding ng comfort room para sa kasintahang nakilala sa pangalang Beng bago ito nagbigti.

Ayon kay Det. John Charles Duran ng MPD-Homicide­ section, dakong alas-5 ng umaga nang madiskubre ng ina nitong si Christine ang  bangkay ng anak na nakabigti sa loob ng kanilang banyo.

Sinabi ni Duran, gusto umanong makipagbalikan ng biktima sa kanyang nobya­ pero tumanggi ang huli dahil nakakatunog na umano ang asawa nito sa kanilang relasyon.

“May asawa ’yong babae, nakikipag-break doon sa biktima dahil nakakahalata na raw ang kanyang mister,” ayon kay Duran.

Posible umanong mahal na mahal ng biktima ang kanyang nobya at hindi nito matanggap ang paghihiwalay nila na nagbunsod sa pagpapakamatay nito. Gayunman, inaalam din ng pulisya kung may naganap na foul play sa pagkamatay nito.

Ang bangkay ng biktima ay kasalukuyang nakalagak sa Cruz Funeral para sa safekeeping at awtopsiya.