Nurse pumalag sa holdap, utas

MANILA, Philippines - Patay ang isang 23-anyos na nurse makaraang manlaban sa isang holdaper kamakalawa ng gabi ng San Juan City.

Ang biktima ay nakilalang si Joross Barquia, 23, at residente ng Bismark Provident Village, J. dela Peña St., Marikina City.

Naisugod pa si Barquia sa San Juan Medical Center ngunit nasawi rin habang nilalapatan ng lunas bunsod nang tinamong tatlong saksak sa leeg at kaliwang braso.

Batay sa inisyal na pagsisiyasat ng San Juan Police, nabatid na dakong alas-8:00 ng gabi nang maganap ang krimen sa Lake St., kanto ng N. Domingo St., sa Brgy. Balongbato, San Juan City.

Sa salaysay sa pulisya ng testigong si Armando Melquiades, nabatid na sakay siya ng kanyang tricycle nang makita ang biktima na duguang naglalakad at humihingi ng saklolo.

Kaagad naman umano itong tinulungan ni Melquiades at dinala sa pagamutan.

Sinabi rin umano ng biktima kay Melquiades na hinoldap siya ng di-kilalang lalaki pero tumanggi siyang ibigay ang kanyang mga gamit kaya siya pinagsasaksak.