2 lider ng grupong Manibela, muling kinasuhan
MANILA, Philippines — Muling kinasuhan ng Quezon City Police District (QCPD) sa Quezon City Prosecutors Office (QCPO) ang dalawang lider ng grupong Manibela dahil sa isinagawang kilos protesta kamakailan sa Quezon City.
Sina Manibela Chairman Mario Valbuena at Regie Manlapig, presidente ng Manibela Bulacan/San Fernando, Pampanga area ay sinampahan ng patung-patong na kaso kabilang ang paglabag sa B.P. 880 (Public Assembly Act of 1985), Article 155 ng Revised Penal Code (Alarm and Scandals), at Article 151 ng RPC (Resistance and Disobedience).
Nagsagawa ng kilos protesta nitong Hunyo 10-12 ang grupong Manibela harap ng Land Transportation Franchising and Regulatory Board dahil sa kanilang pagtutol sa Public Utility Vehicle (PUV) phase-out program ng gobyerno.
Nagdulot ng matinding abala sa publiko at motorista dahil sa umano’y mga panghaharang sa Commonwealth Avenue, East Avenue, at Quezon Avenue.
Wala rin silang maipakitang permit to rally mula sa pamahalaang lungsod.
Ilang miyembro rin ng Manibela ang itinuturong sumuntok at nanakit sa DZRH reporter na si Val Gonzales habang nagbabalita ng kilos protesta.
- Latest
