Mayor Guo, et al nasaLookout Bulletin Order na

MANILA, Philippines — Inisyuhan na ng Department of Justice (DOJ) ng Immigration Lookout Bulletin Order (ILBO) si suspended Bamban, Tarlac Mayor Alice Guo at mga kasamahan nito.

Ayon kay Justice Undersecretary Margarita Gutierrez, nilagdaan na ni Justice Secretary Jesus Crispin Remulla ang ILBO laban kina Guo, dating Technology at Resource Center director general Dennis Cunanan at 12 iba.

Ang naturang ILBO ay naipadala na nila sa tanggapan ng Bureau of Immigration (BI).

Wala pa naman aniyang inilalabas na Precautionary Hold Departure Order (PHDO) laban sa kanila dahil iaaplay pa lamang ito sa hukuman.

Si Guo at 13 iba pa ay matatandaang una nang sinampahan ng Presidential Anti-Organized Crime Commission (PAOCC) at ng Philippine National Police (PNP) ng mga kasong human trafficking sa DOJ.

Una na rin silang ipinagharap ng Department of the Interior and Local Government (DILG) ng kasong graft sa Office of the Ombudsman, na nag­resulta sa pagsuspinde sa kanya ng anim na buwan.

Inisnab din ng Office of the Ombudsman ang mosyon ni Mayor Guo na alisin ang suspension order kaugnay sa reklamo ng DILG sa umano’y pagkakasangkot ng alkalde sa ilegal na operasyon ng POGO sa kanilang lugar.