DOH: Tawa-tawa, siling labuyo, bayabas, ‘di pa napapatunayang gamot sa dengue

MANILA, Philippines — Hindi pa napapatunayan bilang gamot sa sakit na dengue ang mga halamang tawa-tawa, bayabas, at siling labuyo.

Ito ang nilinaw kahapon ni ni Dr. Kim Patrick Tejano, Medical Officer IV ng Department of Health (DOH)-Disease for Elimination and Vector-borne Diseases kaya’t hindi inirerekomenda ng mga eksperto ang mga naturang mga halaman upang gamiting panlunas sa dengue.

Hanggang sa kasalukuyan ay wala pa rin aniyang nadidiskubreng remedyo sa naturang karamdaman, na nakukuha sa kagat ng lamok.

Ayon kay Tejano, mayroon naman aniyang supportive treatment na available ngayon laban sa dengue at sakaling makitaan ng sintomas ng dengue ay kaagad na magpakonsulta sa doktor.