Miyembro ng Masculados, timbog sa droga

MANILA, Philippines — Swak sa selda ang dalawang kalalakihan kabilang ang isang miyembro ng male sexy dance group na Masculados makaraang mahulihan ang mga ito ng droga sa Taguig City kahapon ng madaling araw.

Kinilala ng hepe ng Taguig City Police na si Sr.  Supt. Alexander Santos ang mga suspek na nadakip na sina Robin Rosel,  nasa hustong gulang, miyembro ng nasabing male sexy dance group at Rodel Isaac.

Nadakip ang mga suspek dakong ala-1:00 ng madaling araw sa ikinasang Oplan Sita ng Taguig City Police sa Manuel L. Quezon Road, Brgy.  New Lower Bicutan.

Habang naka-hazard ang sinasakyang kotseng Sedan ng mga suspek, napansin ng mga pulis na isang lalaki ang nag-aabot ng isang kahina-hinalang bagay.

Nang alamin ng mga pulis ang insidente, dito nila nadiskubre ang inabot pala ay 2 umanong plastic sachet ng hinihinalang shabu na humigit kumulang sa 2 gramo.

Kaagad na inaresto ang mga suspek at napag-alaman ng pulisya na ang isa dito ay miyembro ng naturang sexy male dance group.

Ang mga suspek ay nakakulong ngayon sa Taguig City Police at kakasuhan ng pagdadala ng ipinagbabawal na gamot.