Bebot inatado nang saksak ng rider

MANILA, Philippines — Isang hindi pa nakikilalang babae ang nasawi nang pagsasaksakin ng isang motorcycle rider sa Brgy. Manuyo, Las Piñas City, kamakalawa ng tanghali.

Inilarawan ang biktima na nakasuot ng kulay purple na blouse at maong pants.

Ang suspek naman na inilarawang nakasuot ng half-face helmet, itim na jacket at maong pants na sakay ng Honda Click motorcycle na pinaghalong blue at red ang kulay.

Sa salaysay sa pulisya ng isang security guard, alas-12:00 ng tanghali nang nakarinig siya ng komosyon sa open field sa harapan ng The Tent sa Gatchalian Road, Barangay Manuyo Dos at nakita ang isang babae na duguan nakabulagta at itinawag niya ito sa pulisya.

Isinugod sa Las Piñas District Hospital ang biktima ng Manuyo Dos Barangay ambulance, subalit idineklarang dead-on-arrival sanhi ng ‘multiple stab wounds’.