Mga sekyu sa mall pinagbawalan magsuot ng Santa Claus costume

MANILA, Philippines — “Bawal ang pagsusuot ng full Santa Claus costume sa mga security guard partikular sa mga mall ngayong magpapasko”.

Ito ang sinabi ni  PNP-Civil Security Group Director Police Major Gen Leo Francisco sa panayam sa ika-44 na anibersaryo ng PNP-CSG sa Camp Crame.

Sinabi ni Francisco na may prescribed uniform sa mga security guard na dapat sundin at sakali umanong mag-iba ng uniform ang mga security guard ay kailangang dumaan muna ito sa approval ng kanilang tanggapan.

Sakaling labagin, papatawan ng penalty ang security agency na nagpahintulot nito.

Pero nilinaw naman ni Francisco na bagama’t bawal ang full santa claus uniform ay papayagayan naman ng CSG ang pagsusuot ng sumbrero o santa hat.

Maghihigpit naman sa inspeksyon sa mga customer ang mga security guard lalo na sa mga mall ngayong nalalapit na ang kapaskuhan.

Nakasaad aniya ito sa ilalim ng Section 14 ng Republic Act 5487 o Private Security Agency Law. Maaaring patawan ng parusa ang ­security agency ng security guards na lalabag hanggang sa kanselahin ang kanilang permit.