Lady Altas umeskapo sa Lady Red Spikers
MANILA, Philippines — Halos mahimatay na si Cyrille Almeniana dahil sa kapaguran.
Ngunit ibinigay na lahat ni Almeniana sa fifth set para tulungan ang University of Perpetual Help System-DALTA sa 25-19, 25-20, 15-25, 22-25, 17-15 pag-eskapo sa San Beda University sa NCAA Season 101 women’s volleyball tournament kahapon sa San Andres Sports Complex sa Manila.
Humampas si Almeniana ng 18 points para sa 8-1 record ng Lady Altas ni coach Sandy Rieta sa Group A at inihulog ang Lady Red Spikers sa 7-2 sa Group B sa crossover eliminations
Ang crossover hit ni Almeniana ang nagbigay sa Perpetual ng 16-15 abante sa fifth set kasunod ang attack error ni Angel Habacon sa panig ng San Beda na tumapos sa laro.
Nabalewala ang hinataw na 31 points ni Janelle Bachar para sa Lady Red Spikers.
Samantala, bumira si Judiel Nitura ng 22 points para banderahan ang Colegio de San Juan de Letran sa 15-25, 25-19, 19-25, 25-15, 15-10 paglusot sa defending champion De La Salle-College of Saint Benilde.
Ang pang-siyam na sunod na panalo ng Lady Knights sa Group B ang nagbigay sa kanila ng ‘twice-to-beat’ incentive sa quarterfinals.
Tumipa si Gia Maquilang ng triple-double na 16 points, 18 digs at 12 receptions habang umiskor si Vanessa Sarie ng 13 markers, tampok ang clutch service ace na sumelyo sa panalo ng Intramuros-based spikers.
- Latest
