Batch 2009, 2015 kampiyon sa Pulpogan alumni caging
CEBU, Philippines — Ang Batch 2009 ug Batch 2015 maoy nanghawod sa tagsa-tagsa nila ka dibisyon sa Pulpogan National High School (PNHS) Alumni Association Inter-Batch Basketball Tournament didto sa Consolacion ning bag-ohay pa lamang.
Si Kyrie Ybañez milansang sa game-winning buzzer-beater sa dihang ang Batch 2009 nakaipsot sa Batch 2002, 68-66, aron langkaton ang korona sa Category A.
Si Ybañez mitapos uban ang 14 puntos, tulo ka rebounds ug duha ka assists.
Mihimo sab og kasikas si Ernesto Tudtud sa Batch 2009 bitbit ang 19 puntos, upat ka rebounds, tulo ka assists ug duha ka steals aron mamahimong Finals MVP, samtang si Jairus Tampus miamot og double-double nga 10 puntos ug 10 ka rebounds.
Sa laing bahin, ang Batch 2015 mibuntog sa Batch 2020, 62-57, aron sakmiton ang titulo sa Category B.
Si Dongstay Osabel miharos og 14 puntos, 12 ka rebounds, upat ka assists ug tulo ka blocks alang sa Batch 2015 hinungdan nga siya maoy gipasidunggan nga Finals MVP.
Dako sab og naambag sila si Jovan Jumao-as ug Ariel Ortiz nga nagkumbinar og 22 puntos alang sa Batch 2015.
Giorganisa sa PNHS Alumni Association nga gipangulohan ni Teresa Arrofo inabagan sa North Sports Apparel, ang kalihukan nagmalampuson tungod sa suporta ni PNHS Principal Cyrus Wenceslao, Pulpogan Barangay Captain Avelilo Bihag ug konsehal Michael Mercado.
- Latest
