Buzzer-beater ni LeBron misalbar sa LA Lakers

CEBU, Philippines — Luyo sa buzzer-beater tip-in ni LeBron Games, ang Los Angeles Lakers miposte og kulbahinam nga daog batok sa Indiana Pacers, 120-119, aron pakgangon ang tulo ka sagunson nilang pilde sa NBA kagahapong adlawa didto sa Gainbridge Fieldhouse sa Indianapolis, Indiana.

Ang Pacers nakabangon human malubong og 13 puntos sa katapusang kuwarter ug nakalabaw pa gani sa iskor nga 119-118 sa pinal nga 42 segundos.

Sa hilimatyong oras nga nahibilin, si Luka Doncic milusot sa katapusang higayon apan ang iyang itsa igo lamang miuntol sa ring.

Apan si James paspas pas kilat nga milayat aron ituplok ang bola sud sa ring dayong kapupos sa oras hinungdan nga nagkumpyat ang tibuok puwersa sa Lakers sa tumang kalipay.

Ang 40-anyos nga si James mitapos uban ang 13 puntos, 13 ka rebounds ug pito ka assits.

Si Doncic miharos og 34 puntos, pito ka rebounds ug pito ka assists.

Wala sab magpabitin si Austin Reaves nga mitali og 24 puntos ingon man si Rui Hachimura nga midonar og 14 puntos alang sa Lakers nga ikaupat karon sa Western Conference uban ang 44-28 rekord.

Sa laing aksiyon, si Nikola Jokic impresibong mibalik human nakapalta og lima ka duwa tungod sa injury. Mikolekta siya og 39 puntos, 19 ka rebounds ug 10 ka assists sa dihang gibugha sa Denver Nuggets ang Milwaukee Bucks, 127-117.

Tungod niini, ang Denver nagpabilin sa ikatulong puwesto sa West sunod sa Oklahoma City Thunder ug Houston Rockets bitbit ang 46-28 nga baraha.

Didto sa New York, ang Los Angeles Clippers dalaygong namawi human mabiyai og 14 puntos aron patikalbongon ang Knicks, 126-113.

Si James Harden miposa og unom ka 3-pointers sa iyang 29 puntos samtang si Kawhi Leonard miamot og 27 puntos alang sa Clippers nga ikaunom karon sa West uban ang 41-31 nga marka.