Mga bitoon sa Cebu Sports pasidunggan

EBU, Philippines —  39th SAC-SMB Sports Awards kasado na karong Abril 26

Ang Sportswriters Association of Cebu mopasidungog na sab sa mga notadong atleta atol sa 39th SAC-San Miguel Beer (SMB) Cebu Sports Awards nga gikatakda karong Abril 26 diha sa Cube Wing sa SM Seaside City.

Kining tinuig nga kalihukan naghatag og rekognasyon sa mga Sugbuanong atleta, coaches ug personalidad nga mihimo og kasikas sa nasudnon ug internasyonal nga mga kompetisyon sa miaging tuig.

Mangu sa tunolan og major awards mao ang labing dako nga mga pangan sa Philippine sports apil na ang bugtong eight-time MVP sa kasaysayan sa PBA nga si MVP June Mar Fajardo, reigning WPA Women's World 9-Ball champion Rubilen Amit, two-time world boxing champion Melvin Jerusalem ug skateboarding legend Margielyn Didal.

Dugang niini, ang mga Sugbuanong Olympians nga midala sa bandila sa nasud sa 2024 Paris Olympics ibayaw sab sa bantawan sa kadungganan.

Makadawat og special citations ang mga indibidwal ug teams nga nakalangkat og gold medals sa 2024 Palarong Pambansa, ang basketball, volleyball ug football champions sa Cebu Schools Athletic Foundation, Inc. (CESAFI), ug uban pang mikab-ot og halandumon nga kalamposan sa tagsa-tagsa nila ka paugnat sa kusog kansang mga pangan ipahibawo sa dili madugay.

Ang pinal nga listahan sa mga pasidunggan hugtanong gituki ug gihashasan sa mga sakop sa SAC nga gipangulohan sa presidente nilang si John Pages.

Sa miaging tuig, nabalik nga seremonyas human nahunong sud sa upat ka tuig tungod sa kalibuntahong pandemiya.

Ang nabantog nga sports medicine doctor nga si Rhoel Dejaño maoy nakadawat sa Rico Navarro Trophy isip "Sportsman of the Year" samtang sila si Fajardo, Jerusalem, ug karting world champion William John Riley Go nagsawo sa dakong garbo isip "Athletes of the Year".