TNT, Ginebra magtiwas karong gabii

CEBU, Philippines — Usa ka eksplosibong gubat ang gipaabot nga moulbo sa dihang ang TNT Tropang Giga ug ang Barangay Ginebra Kings magtiwas sa Game 7 sa PBA Season 49 Commissioner's Cup Finals karong adlawa (Biyernes, Marso 28) didto sa Smart Araneta Coliseum sa Quezon City.

Magtinagakay ang mainit nga managkaribal sugod sa alas 7:30 sa gabii.

Luyo sa pagmangtas ni Rondae Hollis-Jefferson nga miharos og 29 puntos, 13 ka rebounds ug unom ka assists, ang TNT midaog sa Game 6, 87-83, niadtong Miyerkules aron pagduso sa best-of-seven series ngadto sa tibuok niining rota.

Ang duha ka koponan mobitbit og managlahing misyon sa dihang magpinaksitay sila sa katapusang higayon didto sa Big Dome alang sa gihandum nilang koronan.

Ang TNT ni coach Chot Reyes naglaraw nga sundan ang kampiyonato nga ilang nasakmit sa miaging Governors’ Cup.

Samtang ang Gin Kings ni coach Tim Cone nagtinguha nga makabawos sa sunod-sunod nga kaparotan sa Finals nga ilang nahiaguman sa mga kamot sa Tropang Giga ug mobalik sa trono nga katapusan nilang naangkon niadtong 2023 Commissioner's Cup.