TNT kampiyon sa PBA Commissioner's Cup

CEBU, Philippines —  Ang TNT Tropang Giga mipiog sa Barangay Ginebra Kings sud sa overtime, 87-83, sa makutas ug kulbahinam nga Game 7 sa ilang finals series aron langkaton ang korona sa PBA Season 49 Commissioner's Cup niadtong Biyernes sa gabii didto sa Smart Araneta Coliseum sa Quezon City.

Sila si Rondae Hollis-Jefferson ug Rey Nambatac ang mibandera sa Tropang Giga ngadto sa ikatulo nilang titulo sa miaging lima ka komperensiya ug ika-11 sa kinatibuk-an sa kasaysayan sa ilang prangkisa.

Dugang niini, gisemento sa TNT ang ilang dominasyon Ginebra nga ilang gipaluhod sa ikatulong sunod-sunod nilang panag-abot sa finals.

Usa sa mga responsable niini ang mangtas nilang import nga si RHJ, nga miharos og 25 puntos, 12 ka rebounds, duha ka assists, duha ka steals ug usa ka block aron pag-angkon og laing Best Import ug kampiyonato sa labing unang propesyonal nga liga sa Asya.

Mihimo sab og kasikas si Nambatac, nga maoy gibayaw nga Finals MVP.

Ang kanhi bitoon sa Letran Knights mikolekta og 22 puntos, apil na ang upat ka 3-pointers, sa Game 7 ug miposte og average nga 17.8 puntos, 3.1 rebounds ug 3.4 assists sa serye.

"My appreciation goes to our players, who really found a way. Talagang ayaw magpatalo and this is the result," matud pa ni TNT coach Chot Reyes.

Uban ang duha ka sagunson nilang kampiyonato, si Reyes ug ang iyang mga tropa anaa sa posisyon nga mokab-ot og talagsaong Grand Slam sa umaabot nga Philippine Cup.

"Salamat sa Ginebra for teaching us how to play tough basketball. Salamat sa fans at sa players ng Talk 'N Text. This is a special team and a special group," padayag pa ni TNT governor ug PBA chairman Ricky Vargas.

Ang Tropang Giga nagdanga-danga na unta sa sayong kadaogan sa regulasyon apan ang resident import sa Ginebra nga si Justin Brownlee miposa og krusyal nga tres aron pagpuwersa og OT.

Ang Gin Kings duna pay higayon nga makaduso og ikaduhang overtime apan si Brownlee napakyas ning higayona.

Si Brownlee mipupo og 28 puntos ug 10 ka rebounds aron pangulohan ang walo lamang ka players nga gigamit ni coach Tim Cone ning tinagakay nga sangka.