Visayas G Hoops mosikad na

CEBU, Philippines — Ang labing unang season sa Visayas G Hoops nga gipaluyohan sa VISTECH mo-arangkada na karong adlawa (Biyernes, Hunyo 20) diha sa Sacred Heart School-Jesuit old campus sa General Maxilom Avenue sa dakbayan sa Sugbo.

Magsugod ang mga duwa sa alas-9 sa buntag apan dunay simpleng seremonyas sa pagbukas nga ipahigayon sa alas 2:30 sa hapon nga pagatambongan ni Cebu City Mayor-elect Engr. Nestor Archival, Vice Mayor-elect Tomas Osmeña ug coach Rocky Alcoseba, nga maoy nagpasiugda ning tulo ka adlaw nga grassroots tournament kauban silang Australia-based league organizer Van Halen Parmis ug Rey Cañete.

Sa kinatibuk-an, 24 ka teams - 12 matag usa sa boys 13 ug 15 Under age groups - ang mopapakita'g aksiyon ning developmental league kansang tumong mao ang paghatag sa mga batan-ong atleta og plataporma nga mapasundayag ang ilang abilidad. Magbugno alang sa titulo sa 13 Under division mao ang RJN sa Talisay City, Corajudo's sa Cebu City, Coach Enoc Academy sa Maasin City ug Lakawan Squad sa Tacloban sa Pool A, Go Hard Basketball-Coach Doms sa Cebu City, Dream Big sa Ormoc City, Aloysian Eagles sa Minglanilla ug Batang Mandirigma sa Lapu-Lapu City sa Pool B, ug CKBA sa Consolacion, CIT Wildcats sa Cebu City, JR Hooperz sa Minglanilla ug DSB Seafoods sa Pool C.

Mag-ilog alang sa korona sa 15 Under category mao ang Benedicto Baby Cheetahs sa Mandaue City, Corajudo's, AVC Law ug Bigasan Hub x CKBA sa Consolacion sa Pool A, Go Hard-Coach Doms ug The Realtors sa Cebu City, Loboc Vengers sa Bohol ug WLC Mustangs sa Ormoc sa Pool B, ug Abellana Chiefs sa Cebu City, Cabañero Basketball Academy sa Mahaplag, Leyte, PYFBA Youth sa Talisay City ug Korean Mamba Squad sa Ormoc.   

Si Parmis mibutyag nga aduna silay lain nga torneyo alang sa mga babayeng players sunod bulan.