Sanchez, Hatch lalangoy sa PAI national tryouts

MANILA, Philippines – Makikipagsukatan ang 61 Pinoy foreign-based swimmers sa mahigit 500 local hopefuls sa Philippine Aquatics Inc. (PAI) National Trials sa susunod na linggo sa Teofilo Yldefonso swimming pool sa Malate, Manila.

Pakakawalan ang 50-meter (long course) sa Agosto 15-18 kasunod ang 25-meter (short course) sa Agosto 20-23.

Ikinatuwa ni PAI Secretary-General at Batangas 1st District Rep. Eric Buhain ang paglahok ng mga Filipino-foreign athletes na isang patunay na kinakatigan ng swimming community ang kanilang programa.

“We welcome them, arms wide open, and thankful that Filipino-Foreign athletes are now showing a big desire to join our national pool,” ani Buhain.

“And now they’re coming and willing to be evaluated by PAI. If they’re truly good, they will join the national pool. We will no longer be swayed by reports of fast times by scouts and managers, we must see them to believe. The same goes for our homegrown swimmers from all over the Philippines,” dagdag ng two-time Olympian at Philippine Sports Hall-of-Famer.

Pangungunahan nina Paris Olympians Fil-Canadian Kayla Sanchez at Fil-American Jarod Hatch ang listahan ng mga foreign-based hopefuls na kinabibilangan din nina World Championships veteran at 2019 Manila SEA Games champion Fil-Am Chloe Isleta; multi-title junior internationalist Vietnam-based Fil-Briton Heather White at Fil-American Teia Salvino, ang 2023 Cambodia Southeast Asian Games gold medal winner.

“Walang exception. Dapat lumangoy ang lahat. The presence of our elite swimmers like Kayla (Sanchez) and Jarold (Hatch) would inspire our young contender,” ani Buhain.

Mapapalaban sila sa pinakamahusay na mga homegrown tankers sa pangunguna nina World Championships at SEA Games gold medalists Xiandi Chua, Jasmine Micaela Mojdeh, Patricia Mae Santor, Hugh Antonio Parto at mga beteranong internationalist na sina Gerald Jacinto at Jamesrey Ajido, ang kauna-unahang Asian junior gold winner ng bansa.

Ang national tryouts ang magiging basehan sa pagpili ng mga miyembro ng Philippine Team na lalahok sa 2024 World Aquatics World Cup series (25-meter short course), 46th Southeast Asian Age Group Championships at sa 2025 World Aquatics Championships (50-meter-long course) sa Singapore.

Ang World Series ay binubuo ng kompetisyon sa Oktubre 18-20 (Serye 1) sa Shanghai, China; Serye 2 Oktubre 24-26 sa Incheon, South Korea; at Series 3 Oktubre 31 hanggang Nobyembre 2 sa Singapore.

Ang serye ay magtatapos sa Championships sa Disyembre 10-15 sa Budapest, Hungary gayundin ang 46th SEA Age Group sa Disyembre 6-8 sa Bangkok, Thailand.