Lahi ang Gilas karon
CEBU, Philippines - Lahi ang Gilas karon Nagkamuritsing na gyud hinuon ang Gilas Pilipinas sa ilang kampanya sa medalyang bulawan sa Asian Games didto sa Incheon, South Korea.
Sa pagdaog pa lang sa Gilas batok sa India, nakakita na ko og dili maayong tilimad-on nga duna g’yuy kuwang sa dinuwaan sa mga Pinoy pinangulohan ni Jimmy Alapag.
Nakaingon ko nga “over stated” ra kaayo ang “tough” nga bansag sa team sa India nga maoy gibandilyo sa pipila ka pamantalaan. Sa iskor nga 85-76, mas malubong pa unta ang Indians kun wala mawala ang dinuwaan nila nga gipakita atol sa FIBA World Cup dili pa dugay didto sa Espanya.
Mas misamot ang problema dihang napilde ang Gilas sa Iran sa iskor nga 68-63. Labaw na unta ang Pilipinas sa second quarter, apan mibahar sa nahibiling duha ka kuwarter. Sa duwa sa Qatar pildi gihapon ang Gilas, 77-68. Mao kini ang labing sakit. Kinsa may magdahom nga pwerteng daghana og error sa third quarter ang Gilas ug daw walay gana ang pipila ka players niini.
Si coach Chot Reyes mitawag sa atensyon ni naturalized player Marcus Douthit ug gipangutana kini kun ganahan pa ba kining moduwa. Kay kun dili buhian siya ug papaulion sa ilaha.
Daan na ko nga nag-ingon nga dili na ang Douthit sa miaging tuig ang Douthit nga moduwa karon. Kini tungod sa pagpadaplin kaniya ug gikuha si Andray Blatche alang sa World Cup.
Kun ang duwa sa Gilas didto sa Espanya ilang gidala sa Incheon, bisan tingali ang Iran maglisud og daog, apan dili man ta katagna kun unsay ilang buhaton kun anaa na sa korte.
Apan usa ray akong obserbasyon, pirmeng matambakan ang Pilipinas inig sugod sa third quarter, butang nga wala kaayo
mausab.
Atol ning pagsuwat, nagduwa ang Gilas kontra sa usa sa mga karibal niini ang South Korea.
* * *
PAGTULON-AN: “The true science of martial arts means practicing them in such a way that they will be useful at any time, and
to teach them in such a way that they will be useful in all things.”—Shimen Miyamoto Musashi
- Latest
