Fishing Tournament sa Caubian mosikad na

CEBU, Philippines — Karon nga nikalma na ang hanging amihan ug ting-init na, anaa na sab usa ka laing pocket fishing tournament ang ipahigayon karong Abril 26-27 diha sa kadagatan palibot sa isla sa Caubian sa Dakbayan sa Lapu-Lapu nga giulohan og 1st Gentlemen’s Cup 2025. Subling mag-abot aron magkompetisyon ang mga Sugbuanong anglers nga nahilig na sa maong bag-ong water sporting event nga pagpamasol nga gi-organisar sa Reels Events & Productions.

Giulohan kini og Gentlemen’s tournament tungod kay dinhi ipakita ang pagka-matinud-anon sa usa ka angler. Walay marshals nga mokuyog kanila atol sa ilang pagpamasol pinaagi sa trolling ug jigging.

 Hinuon kinahanglan nga ang angler nga adunay kuhang isda mopresentar og video sa pagkombati niini aron kini makuha. Sama sa mga nangaging fishing tournaments, mga game fish lang ang dawaton nga entry.

Kung kinsa ang nakakuha sa pinakabug-at nga isda maoy modaog. Adunay lima ka mga anglers nga pwedeng makadaog gikan sa champion hangtud sa ikaupat nga pwesto nga dunay premyo sama sa tropeyo ug WinZir Kit.

Ang torneyo anha manukad sa Angasil Port sa Lapu-Lapu City ug alas-9 sa buntag opisyal nga magsugod ang pagpamasol. Ang cutoff time ug awarding anha himuon sa Caubian Island inig alas 12:00 sa udto. — IBM